KUCHING: Sarawak ti diuan mayuh pupu bansa mesti bisi platform ti sama sereta nyadi tanggungpengawa begulai ngemansangka nengeri tu.
Kepala Menteri, Datuk Patinggi Abang Johari Tun Openg madah, di Sarawak bisi tiga raban besai nyengkaum Dayak, Melayu-Melanau enggau China ti ngembuan penyampau pemayuh tubuh ke lebih kurang sama.
“Nya alai, kitai mesti bisi platform ti sama entara kitai laban kitai nemu nadai raban bansa ti ulih merintah nengeri tu.
“Tang mesti nyadi tanggungpengawa begulai semua bansa ngemansangka nengeri tu.
“Lalu tu nyadi platform politik aku. Aku enda ulih jauh ari tu nya alai sechara inklusif enda tau enda bisi,” ku iya.
Iya mansutka pekara nya lebuh bejaku ba pengerami bejadi Begunan Indu Yayasan Budaya Dayak (DCF) enggau Balai Dagang enggau Industri Dayak (DCCI) ti dikelala enggau nama ‘Panggau Dayak Towers’ ba Jalai Ong Tiang Swee ditu, kemari.
Lebuh ke bejaku bekaul enggau dua buah begunan indu opis nya, Abang Johari madahka perintah ti diperintah Gabungan Parti Sarawak ngembuan polisi ti inklusif tauka mungkur semua raban bansa.
Ku Abang Johari, iya ti nyadi kepala menteri sereta disukung sapit kepala menteri enggau raban bansa Dayak, patut sama ngambi bagi ngangkat enggau nempa raban bansa kelebih agi diatu betapi enggau COVID-19 ti mayuh mai ubah, nyengkaum ba pengawa dagang ti enda ulih dipejalaika baka ngelama tu.
“Berindik ari pekara tauka ubah ti nyadi, aku enggau sapit kepala menteri sereta ketuai Dayak, bepenemu nama kebuah enda nyikap raban bansa Dayak awakka sama ngambi bagi ba ubah ke nyadi kelebih agi dalam landskap ekonomi nengah chara enda ngemunaska identiti kita (Dayak).
“Aku kepala menteri ungkup semua bansa di Sarawak.
“Nya kebuah maya dipadahka raban bansa Dayak deka ngaga sebuah begunan ke ulih ngetanka budaya orang Sarawak ari sukut DCF, sereta mega ngambika sama ngambi bagi dalam pemansang ekonomi kitai, aku madahka ‘ok’ kitai ngemendarka nya ungkup dua organisasyen tu (DCF enggau DCCI),” ku iya.
Iya madahka palan dua begunan nya chukup strategik dalam pemansang mengeri iya nya semak enggau universiti, sepital, besemak enggau perengkaguna mensia mayuh ke bukai nyengkaum semak enggau Indu Opis DBNA.
Ku iya, langkar begunan ti bisi dua menara ngembuan reti, begunan keterubah (DCCI) ungkup Dayak moden ti ngemeranka polisi pengawa dagang lalu sebuah agi menara (DCF) kena ngetan enggau nyaga budaya Dayak.
“Enti kita dalam raban bansa Dayak bisi platform, aku pechaya amat Dayak deka maju enggau jampat agi,” ku iya.
Dulu ari nya, Sapit Kepala Menteri Datuk Amar Douglas Uggah Embas meri terima kasih ngagai perintah nengeri ti betuaika Abang Johari ti udah meri kandang endur ke strategik ti mungkur pemesai 2.32 hektar alai ngaga Panggau Dayak Towers.
Uggah ti mega nyadi Menteri Wang Kedua madah, perintah nengeri udah meri RM20 juta kena ngaga Panggau Dayak Towers nya ti udah ngujungka projek nya udah berengkah dipejalaika.
“Ba kandang endur pemesai 2.32 hektar, kami deka ngaga dua menara (DCF enggau DCCI) lalu ba tanah ke agi puang mega deka dikemansangka nyadi palan alai diau, iya nya endur ngaga apartment enggau kondominium.
“Ungkus ngaga kededua menara nya RM36 juta. Sepenyampau RM20 juta geran ari perintah nengeri. Kitai agi begunaka belanja RM16 juta kena ngaga kondominium enggau apartment alai diau, lalu ngarapka kepala menteri ulih berundingka pekara tu.
“Kitai arap bendar projek tu ulih digaga tembu nitihka timpuh ti udah ditetapka,” ku iya ti mega nyadi Chairman DCF sereta chairman begulai komiti pemansang begunan DCF enggau DCCI.
Enggau penembu bengunan nya ila, DCF deka ngembunan kereban seni ke pemadu baru sereta bisi palan galeri ti besai, kelimpah ulih terus bejalaika pengawa ngelakuka enggau nyaga Pesaka Budaya Sarawak, ku iya.
Penembu pengawa ngaga begunan DCCI nya ila ku iya, deka nyadi palan dagang ngagai raban bansa Dayak ngepunka dagang enda ngira mengeri dalam nengeri tu sereta tuju ke bukai.
Nitihku Menijar Besai Panggau Dayak Sdn Bhd, Allister Hilton Smith ti nyadi pemaju projek, dipelabaka projek nya deka tembu digaga tengah taun 2022.
Sama bisi ba pengerami nya Managing Trustee DCF Tan Sri Datuk Amar Leonard Linggi Jugah, Presiden DCCI Dato Leonard Martin Uning, Sekretari Perintah Nengeri Datuk Amar Jaul Samion enggau pemesai renggat perintah besai enggau nengeri ke bukai.
oleh Rengenyan Labang – Utusan borneo
