SIBU: Bisi 34 iku tuai rumah panjai ba kandang menua Nangka sepenemu enggaika Majlis Pengurusan Komuniti Kampung (MPKK) ditumbuh ba kandang menua sida.
Nitih ku Chairman Komiti Rumah Panjai Nangka Tuai Rumah (TR) Eddy Jemat madah, Komiti Pengelikun enggau Pemansang Genturung Pendiau (JKKK) udah megai tenggungpengawa enggau manah ngelama tu.
Nya alai, Eddy ngerundingka nyema MPKK nya ditumbuhka semina deka mai penyarut runding ngagai peranak di rumah panjai.
“Kami tuai rumah panjai di kandang menua Nangka endang ngenggaika MPKK ditumbuh ba kandang menua kami,” ku Eddy begulai enggau 33 iku tuai rumah panjai ke bukai dalam siti gempuru di Sibu malam ensanus.
Eddy madah agi, nyema tuju MPKK nya ditumbuh dikena mantu rayat, perintah besai ari baruh pegai Pakatan harapan (PH) ulih mega meri bantu agih belanja nengah JKKK di tetiap rumah panjai.
“Enggau nya, kami bisi belanja tambah dikena ngatur mayuh agi program enggau aktiviti ti terus ulih meri pemaik ngagai komuniti rumah panjai.
“Tang, nama guna numbuhka siti agi MPKK nyema sistem (JKKK) ti bisi ngelama tu nyata udah bejalaika tanggungpengawa enggau manah sereta efektif dalam mantu rayat,” ku iya.
Eddy madah agi, bisi beberapa rumah panjai di kandang menua Nangka udah bisi digusung orang ke dipadahka bisi kaul enggau pengawa numbuhka MPKK tu, lalu sida mega bisi mai pom ke diisi peranak rumah panjai.
“Tang kami enda nerima penatai sida lalu madahka enda besetuju enggau MPKK ditumbuhka,’ ku iya.
Sama sepenemu enggau Eddy iya nya TR Dick Ijau ke alai iya madahka penumbuh MPKK tu enda meri pemaik, tang deka mambarka penyerakup komuniti Iban.
“Pengari rayat kami (Kaban Kunsil Nengeri Dr Annuar Rapa’ee) udah bebendar mai pemansang di kandang menua Nangka nyengkaum di semua rumah panjai.
“Iya udah ngemansangka mayuh infrastruktur ke pengelantang peranak di rumah panjai. Nya alai, nadai kebuah kami nyukung MPKK ditumbuh,” ku iya. – Utusan Borneo Online
