BETONG, Mac 12: Siti ari pinta ngagai peminta pengereja pengawa perintah iya nya nulis siti esei pandak dalam English maya interviu, tang mayuh kes orang ke diinterviu nya semina nganjung keretas pulai kusung ketegal enda landik ba jaku nya.
Menteri Pelajar, Sajns enggau Pansik Teknologi Dato Sri Michael Manyin Jawong madahak iya bisi dipadahka pasal pekara nya empai lama udah, lalu nya tebal agi nyadi ba raban graduate ari menua pesisir.
Ku iya, sebedau tu bisi sekeda orang ke minta kereja nya nguji nulis esei nya tajapan rurun jalai jaku enggau jaku ke dikena nya salah, tang rebak ke baru tu enda nemu nulis seleka jaku English, lalu nya kebuah sida enda ulih gawa perintah.
“Nya kebuah aku serius pasal Program Landik Ba English, lanan komuniti kitai deka tinggal nyema kitai enda beratka pekara tu. Aku mega arapka komuniti enggau sekula nyukung program tu laban semina tu chara kitai nyingkang ke mua,” ku iya lebuh bejadi programnya ba SK Nanga Ajau ditu bedau lama udah.
Manyin muji sekula ba sitak Layar nya nyadi sekula keterubah di menua pesisir bejadi Program Landik Ba English sida dikena ngangkatka.pengelandik nembiak sekula nya bejaku English.
Ku iya baru, ngemansangka jaku English enggau nambahka pengerindu nembiak ba sains, teknologi, injiniring enggau matematik (STEM) endang subjek ti dikemeratka opis pelajar kenyau ditumbuhka kena Mei 7 taun siti nyin tadi.
Ku iya surat teaau ke udah diberi ngagai kaban kunsil negeri di negeri tu, sekalika ari Barisan Nasional (BN) tauka penyakal ngiru sekula dalam sitak sitak ngambi bejalaika Program Landik dalam English.
Tu udah dititihka SK Ulu Lubai enggau SK Ba Kelalan, dua buah sekula di Limbang ti udah bejalaika program tu beberapa taun ke udah.
Manyin pechaya SK Nanga Ajau ulih nyadi chunto ngagai sekula bukai enti orogrqm nya dipejalaika enggau manah ngambika bala nembiak di sekula nya landik bejaku English.
“En SK Ulu Lubai sebuah sekula ke majoriti bansa Iban ulih, nama kebuah SK Nanga Ajau enda ulih bulih pemujur ke sama?” ku iya.
Program ba SKNanga Ajau dipejalaika nengah kwrwjasama enggau sekula Lodge Group.
Program nya udah ngempuruka 28 iku nembiak sekula Lodge enggau enam iku pengajar ngemujurka ‘Pen-Pal Project’ enggau SK Nanga Ajau, ke alai sida mega bepeluang ngasaika peneleba pengidup di rumah panjai.
Berebak enggau nya Kepala Pengajar SK NangaAjau, Fadreen Jingan madahka sekula nya bisi nerima belanja RM30,000 ari ADUN Layar, Gerald Rentap dikena ngaga mayuh bengkah program dikena ngangkatka pengelandik nembiak dalam jaku English. — DayakDaily
